അ ല യാ ളി

ഒരിക്കല്‍ ആറന്മുളക്കണ്ണാടി നിര്‍മിക്കുന്ന കലാകാരന്റെ വീട്ടില്‍ സംസാരിച്ചിരിക്കുകയായിരുന്നു. ആറന്മുളക്കണ്ണാടി ലോകപൈതൃകപ്പട്ടികയില്‍ ഇടംനേടുന്നതിനുമുമ്പായിരുന്നു അത്‌. സംഭാഷണത്തിനിടയില്‍ അദ്ദേഹം പറഞ്ഞു, തങ്ങളുടെ പൂര്‍വികര്‍ ശങ്കരന്‍കോവിലില്‍ നിന്ന് തിരുവിതാംകൂര്‍ രാജാവിന്റെ ക്ഷണപ്രകാരം ആറന്മുളയില്‍ കുടിയേറിയവരാണെന്ന്. കന്യാകുമാരിയിലെ മയിലാടിഗ്രാമത്തിലുള്ള ഒരു ശില്‍പി, തങ്ങളുടെ പൂര്‍വികര്‍ ശുചീന്ദ്രം ക്ഷേത്രവേലകള്‍ക്കായി കഴുകുമലയില്‍ നിന്ന് വന്നവരാണെന്നു പറഞ്ഞതും ഓര്‍ക്കുന്നു.

-കഴുകുമലയും ശങ്കരന്‍കോവിലും...
കലാകാരന്മാരുടെ പെരുമയുടെ മുദ്രകള്‍ പതിഞ്ഞ ഗ്രാമങ്ങള്‍. വിശ്രുതമായ ഒരു ജൈനസര്‍വകലാശാല കഴുകുമലയില്‍ പ്രവര്‍ത്തിച്ചിരുന്നുവെന്ന് അഭിപ്രായപ്പെടുന്നവരുണ്ട്‌. എന്നാല്‍ ഈ കുറിപ്പ്‌, കഴുകുമലയെക്കുറിച്ചല്ല;(അത്‌ മറ്റൊരു പോസ്റ്റില്‍) കഴുകുമലയിലെ വെട്ടുവാന്‍ കോവിലിനെക്കുറിച്ചാണ്‌

നവംബറിലാണ്‌. ഗുരുവായൂര്‍-ചെന്നൈ എക്സ്പ്രസ്സ്‌ നാഗര്‍കോവില്‍ ജംഗ്ഷന്‍ താണ്ടിയതിനു ശേഷം, ആ പ്രഭാതക്കാഴ്ചകള്‍... ധാരാളം പക്ഷികള്‍... തീവണ്ടി കടന്നുപോയ കന്യാകുമാരി-തിരുനല്‍വേലി-തൂത്തുക്കുടി ജില്ലകളിലെ കൃഷിയിടങ്ങളിലും നീര്‍ക്കെട്ടുകളിലും ഇരതേടുന്ന ദേശാടനപ്പറവകള്‍. ഏറെയും ബ്ലാക്ക്‌ ഐബിസ്‌. ആ യാത്രയ്ക്കിടയില്‍ കൂന്തക്കുളം ഗ്രാമം ഓര്‍മയില്‍ വന്നു. ഈ പക്ഷികളെല്ലാം ചേക്കേറുന്നത്‌ കൂന്തക്കുളത്താണ്‌.